Josué George Falle

Ch't' articl'ye fut c'menchie en Jèrriais

Josué George Falle (1820-1903) 'tait un Juge, Connêtabl'ye et Député.

I' fut né à Saint Saûveux en Jèrri en 1820 (bâptîsi à Saint Saûveux l'12 dé Dézembre), lé fis d'Josué Falle et Esthèr Bèrtram. En 1838 il allit jouaindre la Compangnie Falle, fondée par ses oncl'yes R'chard et Élie à Tèrre-Neuve en 1830. Auprès lus morts i' 'tait en chèrge d'la compangnie et sa pêque dé mouothue à la Côte. En 1848 i' d'vînt membre d'l'Assembliée Législative d'la Tèrre-Neuve.

Pus tard, i' r'vînt en Jèrri et s'mathyit auve Mathie Lîzabé Godfray. Il' eûtent 3 êfants. En 1864 i' fut êlu Député d'Saint Hélyi et auprès 9 mais êlu Connêtabl'ye dé Saint Hélyi. Duthant sa Connêtablyie la Salle Pârouaîssiale fut bâtie, lé Lower Park fut grée et la restaurâtion du Templ'ye Pârouaîssial fut entréprînse.

En 1873 i' fut êlu Juge, et pouor les trente ans tchi siévaient i' m'nait les consèrvateurs. Il opposait l'usage d'la langue Angliaîche dans l's Êtats d'Jèrri; i' souôt'nait les Recteurs dans l'Assembliée, et tout changement d'la constitution. Tout coumme, i' proposait d's amendements dans la louai, et en partitchulyi la louai sus les testaments, et présidait l'Conmité des Caûchies auve hardi d'expéthience.

En 1893 i' baillit à La Sociêté Jèrriaise sa maîson dans lé C'mîn d'la Caûchie pouor san mûsée.

I' mouothit l'15 dé Févri 1903. San fis, Bèrtram Godfray Falle, d'vînt membre du parlément du Rouoyaume Unni pouor Porchémue, et pus tard l'Baron Portsea.