Robert Ranulph Marett

Ch't' articl'ye fut c'menchie en Jèrriais

Robèrt Ranulph Mathet (13 dé Juîn 1866 – 18 d'Févri 1943) 'tait un r'chèrcheux anthropologique.

I' fut né l'13 dé Juîn 1866 au Blianc Pîngnon, La Haule, Saint Brélade, lé seul fis d'Messire Robèrt Pipon Mathet et Julia Anne Mathet. Auprès eune êducâtion au Collège Victoria i' gângnit eune pliaiche à l'Unnivèrsité d'Oxford (au Collège dé Balliol) où'est qu'il êtudyit l'Latîn et gângnit des prix (parmi ieux un prix pouor eune poésie en Latîn entouor Jèrri et l's Îles d'la Manche tchi les compathait auve les Îles ès Beinheutheurs des anciens).

I' 'tait pouor siéthe la cârriéthe dé san péthe dans la louai et i' d'vînt un avocat Angliais en 1885 et un avocat Jèrriais en 1891. Mais ch't' année-là, l'Collège d'Exétèr à Oxford lé nommit Parchonnyi du Collège et i' lanchit des lectuthes en philosophie.

En 1892 i' d'vînt douoyen du collège et en 1893 ses êtudes dans la philosophie des peupl'yes app'lés à chu temps-là prînmitifs l'înspithîtent à faithe un var vèrs l'anthropologie. Viyant qu'l'êtude d'la philosophie à l'unnivèrsité n'atchilyait dgéthe autcheune aut' chose qu'la cheinne des Grècs et des Romains, y'avait du hèrtchîn quand nou réalîsit qu'Mathet 'tait à ensîngni un sujet si prînmitif. Mais Mathet pèrsuadit l'unnivèrsité d'accepter l'anthropologie coumme sujet.

Il êcrivit un tas d'papièrs et d'livres entouor lé sujet et fut învité d'donner des lectuthes à Cambridge, en Êcosse, en Irlande et ès Êtats Unnis.

En 1910 et 1911 il aîdgit la dêfouithie archéologique à La Cotte dé Saint Brélade, et tcheûtit des sou pouor souôt'nîn l'travas. Et en Jèrri i' continnuait d'garder un întéthêt dans la vie tchultuthelle. Il avait héthité l'Mangni d'La Haule d'sa méthe et i' remplyit la maîson atout eune collection d'portraits et d'livres entouor Jèrri. Il espéthait pouver fonder eune unnivèrsité ou collège d'êtudes en Jèrri, mais sans sa présence continnuelle en Jèrri rein d'ité n'tait praticabl'ye. I' s'assèrmentait coumme avocat à l'Assise d'Héthitage rédguliéthement.

En 1913 i' d'vînt un Docteu ès Scienches. En 1928 i' d'vînt l'Recteu (ch'est à dithe lé Président) du Collège d'Exétèr et gardit l'honneu jusqu'à sa mort. I' 'tait Président d'La Sociêté Jèrriaise 1929-1931.

I' mouothit l'18 d'Févri 1943.