Douard VII du Rouoyaume Unni

L'Rouai Douard VII (Albert Edward, 9 d'Novembre 1841–6 d'Mai 1910) 'tait l'Rouai du Rouoyaume Unni et des aut's tèrritouaithes d'Empithe Britannique, Duc dé Nouormandie (dans l's Îles d'la Manche) et l'Empéreu d'l'Înde.

L'Rouai Douard VII (gouvèrnait 1901-1910).

I' 'tait l'fis d'la Reine Victoria et dé s'n houmme lé Prînce Albèrt, et avait mênom Bertie. Quand la fanmil'ye Rouoyale vîsitit l's Îles d'la Manche en 1846, lé janne mousse 'tait habilyi en costeunme dé mat'lot. Les portraits dé ch't habit-là quémenchîtent eune mode pouor les mousses habilyis à la mathinne - et toute sa vie, Douard 'tait pouor la mode et tout chein tchi 'tait faichonnabl'ye.

Ses pathents, sustout l'Prînce Albèrt tchi 'tait divèrsément séthieux et întérêssi dans les scienches, lî donnit eune bouonne êducâtion, mais Douard n'tait pon un bouon êtudgiant - san mêtchi 'tait pustôt coumme bouonhoumme dé sociêté. Y'avait tchiques scandales duthant les longues années quand i' 'tait l'héthitchi au trône (i' pâssit pus longtemps coumme héthitchi au trône qu'autcheune aut' pèrsonne dans l'histouaithe du Rouoyaume Unni).

I' s'mathyit auve eune prîncêsse du Dannemar, Alexandra - mais i' 'tait pustôt couotheux dé c'mîns et parmi ses maitrêsses, 'tait la Jèrriaise, Lillie Langtry.

Quand il arrivit au trône lé 22 d'Janvyi 1901, il avait 59 ans. Coumme Rouai, il avait des bouôns lians auve les rouoyaumes d'Ûrope car tant d'êfants et p'tits êfants à la Reine Victoria avaient mathié des membres des fanmil'yes Rouoyales des pays Ûropéens, et nou l'mênommit "l'Oncl'ye dé l'Ûrope". Épis ses talents dipliomatiques aîdgîtent l'Entente Cordgiale sinnée en 1904 entre lé Rouoyaume Unni et la France. Auprès l'long règne à Victoria, lé p'tit règne à Douard donnit eune împression dé modèrnité et d'libèrté (sénon dans les colonnies Britanniques).