Ch't' articl'ye fut c'menchie en Jèrriais

V'nise (en Italien Venezia ; en Vénitien Venexia) est eune ville du Nord d'l'Italie tchi fut fondée sus un amas d'îles. La populâtion est dans les 272,000, dé tchi dans les 62,000 d'meuthent dans la grande île, 31,000 dans l's îles, et 176,000 dans les villes et villages du bord du lagon.

Ch'est l'Grand Canné tchi crouaîse la ville dé V'nise en forme d' S

Histouaithe amendaer

S'lon la légende la ville fut fondée en 422 par des Romains tchi fiêsaient la Tchête dé Rome. Probabliément nou-s'avait c'menchi à settler dans les mathais et sus les hoummets du lagon sans mathées d'pis l'2e siècl'ye. Pouor la fîn du 6e siècl'ye lé pouvé d'l'Empithe des Byzantîns 'tait raîque dans la carre du Nord-Êt (la contrée d'Ravenne et à l'entou). Des caûchies fûtent grées ès bords du lagon. La tchête du pouvé Byzantîn à Ravenne en 751 laîssit un fliotchet d'chefs locaux. Lé chef des cheins du lagon avait r'chu l'titre dé duc dé l'Empéreu à Constantinopl'ye, et ch'est l'duc tchi d'vînt lé doge dans la langue du pays.

 
Un portrait d'la Pièche Saint Mar dé Canaletto

Au 9e siècl'ye lé doge s'èrmuit à l'île Rialto et v'là tchi c'menchit la bâtithie d'la fanmeuse ville dé V'nise – la preunmié basilique dé Saint Mar, lé palais ès Doges, les cannieaux et les ponts tchi r'lient l's îles. En 828 les r'liques dé Saint Mar fûtent volées d'Alexandrie et pliaichies dans la basilique.

Du 9e siècl'ye au 12e siècl'ye V'nise dêv'loppit coumme un empithe mathitînme dans la Mé du Mitan. Pouor l'13e siècl'ye la républyique dé V'nise attriotchit du conmèrce et d'l'art. Les grandes fanmil'yes tchi contrôlaient la républyique souos la présidenche du Doge (êlu la vie duthante) faîthaient d'la compétition pouor la décothâtion d'lus palais.

Pouor la fîn du 15e siècl'ye V'nise 'tait la deuxième grande ville d'l'Ûrope, auprès Paris.

Duthant la R'naîssance et l'Baroque des artistes et des sounneurs 'taient empliyés à V'nise:

L'avanche d'l'Empithe des Ottomans au 16e siècl'ye et la centralîsâtion d'pouvé dans les grands rouoyaumes d'Ûrope arrêtîtent l'avanche dé la Républyique dé V'nise. La ville et ses tèrritouaithes restaient împortants dans l'conmèrce et partitchuliéthement par ses mannifactuthes dé vèrre par exempl'ye.

En 1797 la Républyique fut contchéthie par Napoléon Bonaparte et v'là tchi fut la fîn d'l'îndépendance dé V'nise (sénon duthant tchique mais d'révolution en 1848-1849). En 1798 l'Autriche prînt la ville. Lé rouoyaume Napoléonnien d'Italie prînt la ville s'lon un accord d'1805 mais l'Autriche r'eût la ville auprès la tchête dé Napoléon en 1814.

En 1866 V'nise fut încorpouothé dans l'Rouoyaume d'Italie.

Transport amendaer

 
"J'ai veu lé ciel dé l'Italie/Et V'nise et ses gondolièrs"

V'nise est la pus grande pièche en Ûrope sans vaituthes. Lé transport dans la ville est à pid ou en baté. Lé baté à nagi dé couôteunme dé V'nise est la gondole, mais ch'est pustôt des batchieaux-beusses tchi tchithient les gens par les cannieaux au jour d'aniet.

En 1846 un pont dé c'mîn d'fé fut bâti entré V'nise et Mestre, eune ville du bord du lagon. En 1933 un pont tch'avait nom Ponte del Littorio fut bâti pouor les boulants tch'ont à partchi dans eune parqu'thie sus l'but d'l'île. Chu pont fut r'bâptîsi Ponte della Libertà auprès la tchête du Fascisme.

L'aéroport dé V'nise tch'a nom Marco Polo s'trouve à Tessara à 13 km dé V'nise et à 8 km dé Mestre.

 

Y a co' de quei à vei' ou à ouï' entou'
V'nise
sus les Coumuns à Viquipédie