Saint Pétersbourg
Ch't' articl'ye fut c'menchie en Jèrriais
|
Saint Pétersbourg (
Saint Pétersbourg; en Russe: Санкт-Петербу́рг) est eune ville en Russie. Ch'est la deuxième pus grande ville par populâtion en Russie et la quatrième en Ûrope. La populâtion est dans les 4,6 millions d'gens.
Histouaithe
amendaerLa ville fut fondée par Pièrre lé Grand d'Russie lé 16 dé Mai (27 d'Mai dé l'almonnas Grégorien) 1703 à l'engoulême d'la riviéthe Néva sus les bords d'la Baie d'Fînlande d'la Mé Baltique. Lé Tsar avait vaîntchu dans la dgèrre contre la Suède et gaffit chu tèrritouaithe tchi donnait à la Russie la pôssibilité d'graie des caûchies sus la Mé Baltique, et s'lon les patholes du poète Alexandre Pouchkinne, "ouvri eune fénêt' à l'Ûrope".
Un fort, lé fort Pièrre et Paul, fut bâti et eune ville dêv'loppit s'lon les plians du Tsar sus l's îles à l'entou.
En 1712 la nouvelle ville dévînt la capitale dé la Russie (à la pliaiche dé Moscou). Les Tsars attriotchîtent les miyeurs architectes à seule fîn d'embelli la ville. Saint Pétersbourg est connu pouor sén architectuthe Italienne, ses cannieaux et ses palais et mûsées.
Lé 18 d'Août (31 d'Août) 1914 lé nom d'la ville fut changi viyant qu'nou criyait qu'lé nom 'tait trop Gèrmannique s'lon l's avis du temps d'la Preunmié Dgèrre Mondiale. Lé nom ("ville à Pièrre") fut translaté en Slavon: Petrograd.
Au mais d'Novembre 1917 les Bolchéviques lanchîtent un co d'êtat à Saint Pétersbourg et rempliaichîtent lé Gouvèrnément pouor Achteu tch'avait gouvèrné l'pays (en prîncipe) dépis la tchête du Tsar. En 1918 lé nouvieau gouvèrnément r'muit la capitale d'èrtou à Moscou.
En 1924 auprès la mort d'Léninne, la ville fut r'bâptisie d'èrché et l'26 d'Janvyi ou d'vînt Lénîngrad.
Lé 6 d'Septembre 1991 la ville r'eût san preunmié nom: Saint Pétersbourg.
