Ch't' articl'ye est êcrite en Jèrriais


La capitale (ou chef-luù en normaund) d'un pays ou d'eune région est la ville dans tchi qu'nou trouve lé gouvèrnément ou l'parlément. L'pus souvent, ch'est la ville la pus grande ou la pus împortante, mais chenna n'est pon tréjous d'même.

Caën est la capitale d'la Bâsse Nouormandie

Londres, la capitale d'l'Angliétèrre et du Rouoyaume Unni, est la pus grande ville d'ches pays, mais Êdîmbourg, la capitale d'l'Êcosse, est pus p'tite qué Glasgow.

Y'a des pays dé tchi la capitale fut fondée d'eune manniéthe artificielle, coumme Washington, DC ès Êtats Unnis ou Canberra en Australie. Tchiquefais la capitale est r'muée d'eune ville à eune aut' – par exempl'ye a ches drein la capitale dé Kazakhstan fut r'mué d'Almaty à Astana.

Y'a des pays tch'ont pus qu'ieune capitale: la capitale des Pays Bas est Amstèrdam, mais l'gouvèrnément s'trouve à La Hague, et en Afrique du Sud, lé gouvèrnément est à Prétoria, lé parlément au Cap et la haute cour à Bloemfontein.

Dans des pays la capitale est appouaintée s'lon la constitution ou la louai, mais dans d'aut's pays la capitale n'est pon fixée légalement – par exempl'ye, en Jèrri i' n'y'a pon d'louai tch'oblyigent les Êtats d'Jèrri d'siégi à Saint Hélyi et y'a ieu des séances spéciales des Êtats dans d'aut's pâraisses.

Nou peut aver étout eune capitale d'eune provînce ou d'eune région. Par exempl'ye: la capitale d'l'êtat d'Nouvieau York est la ville d'Albany; la capitale d'la Baviéthe est Munich; la capitale d'la Frisie (Friesland) est Ljouwert (Leeuwarden).

Viyiz itou amendaer