Riviéthe dé Janvyi
Ch't' articl'ye fut c'menchie en Jèrriais
|
La Riviéthe dé Janvyi (
Riviéthe dé Janvyi; en Portûndgais: Rio de Janeiro) est eune ville au Brési. La ville 'tait la capitale du Brési (1763–1960) et d'l'empithe Portûndgais (1808–1821). Ch'est la deuxième pus grande ville du Brési auprès la ville dé Saint Paul (San Paulu) et a eune populâtion dans les 11-12 millions. Ch'est la capitale d'l'êtat d'la Riviéthe dé Janvyi.
Histouaithe
amendaerDes Portûndgais arrivîtent dans la baie où'est qu'est la ville achteu l'20 d'Janvyi 1502. Ch'est lé ch'na d'la bouoche d'la baie tch'est l'originne du nom d'la ville. L's Améthîndgiens tchi d'meuthaient là trotchaient pouor d's années auve des navidgands Ûropéens tchi hâvraient dans la baie.
En 1555 eune fliotte tchittit Dgieppe pouor aller fonder eune colonnie Française Protestante en Améthique du Sud. Nicolas Durand de Villegagnon fondit la colonnie tch'avait nom la France Antarctique dans la baie d'la Riviéthe dé Janvyi. Tout coumme, pouor 1560 les Portûndgais avaient prîns l'tèrritouaithe et l'preunmiyi d'Mar 1565 la ville dé Saint Sébastchien d'la Riviéthe dé Janvyi (São Sebastião do Rio de Janeiro ) fut fondée en l'honneu du Rouai Sébastchien I d'Portûnga.
En 1763 l'adminnistrâtion colonniale d'l'Améthique Portûndgaise r'muit à la Riviéthe dé Janvyi.
En 1808 la fanmil'ye rouoyale du Portûnga, acanté la noblièche dé Lisbonne, fiêsîtent l'învâsion d'Napoléon et la Riviéthe dé Janvyi d'vînt la capitale du Portûnga (la seule capitale Ûropéenne horte continnent). En 1815 quand l'Brési d'vînt un rouoyaume (partie d'un rouoyaume unni du Portûnga et du Brési) la Riviéthe dé Janvyi continnuait coumme capitale du rouoyaume. Quand l'îndépendence du Brési fut êtablyie en 1822, la ville restait la capitale dé l'Empithe du Brési ouaithe qu'la ville dé Saint Paul gângnîsse du pouvé êcononmique et politique.
Pouor l's années 1930, lé tourisme attriotchait du monde ès grèves d'la ville. Iun des mèrs d'la ville, la grande statue du Christ Rédempteu sus l'mont Corcovado, fut êrigi en 1931. La statue, grée par l'înginnieux Heitor da Silva Costa et l'stchulpteux Français Paul Landowski, a 38m dé haut.
En 1960 la capitale du pays fut r'muée à la nouvelle ville dé Brasília. D'pis lé c'menchement d'la républyique en 1891 nou-s'avait proposé qu'la capitale dévthait êt' pliaichie pustôt au mitan du pays, car y'avait trop dé dêv'loppement êcononmique par la côte tchi 'tait trop à la rade du restant du pays.
Dé 1960 à 1975 la ville 'tait iun d's êtats fédéthaux d'la républyique, mais en 1975 la ville-êtat fut jouainte à l'êtat vaîthîn d'la Riviéthe dé Janvyi.
