Moûque à myi

Ch't' articl'ye fut c'menchie en Jèrriais

Eune moûque à myi ou un bourdon ( moûque à myi; Cotentinais : maôque à mié; Guernésiais : abeille, aise, bourdaon, mouque à miel; Serkyee : mokami) est eune însecte d'la fanmil'ye Apis tchi fait du myi.

Originne

Les moûques à myi êvoluîtent probabliément en Âsie du Sud, mais les moûques à myi du Vouêt dêv'loppîtent en Afrique et viagîtent en Ûrope. En 1622 de colonnistes apportîtent des moûques à myi en Améthique du Nord où'est qu'i' lus êtablyîtent l'travèrs du continnent jusq'ès Montangnes Rotcheuses. Les moûques à myi fûtent întroduites en baté jusqu'en Califournie au mitan du 19^e siècl'ye.

Manniéthe dé vie

De moûques à myi sus un paûmi

Les moûques à myi sont d's însectes dé colonnie tchi d'meuthent ensembl'ye ofûche dans eune rueûque (Guernésiais : rucque; Cotentinais : bine; Serkyee : rüch). Les moûques à myi râmassent du chucrîn d'flieurs ès pliantes du vaîthinné à seule fîn d'en graie du myi tch'i' stôrrent dans lus rueûques dans des paûmièrs. I' râmassent étout d'la p'tite graine ès flieurs tch'i' gardent coumme proteïnne.

Dans eune colonnie y'a eune méthe ès moûques ou vielle des bourdes (Guernésiais : la royne, la grànde) tch'est la seule ponn'rêsse. Y'a des mâles (Guernésiais : sounnaeux) étout, épis un tas d'ouvriéthes.

L's ouvriéthes ont un pitchet auve tchi qu'i' peuvent pitchi des bêtes tchi dangèlent. S'i' piquent un grand annima, par exempl'ye eune pèrsonne, lé pitchet est laîssi driéthe dans la pé d'l'annima et la moûque à myi en meurt.

L'êss'mage est quand eune rueûtchie d'moûques à myi sied eune vielle méthe ès moûques pouor aller êtablyi eune nouvelle rueûque. Les cheinnes tchi restent dans la vielle rueûque êlèvent eune nouvelle méthe pouor continnuer lus vie. Ch'est d'même qu'les colonnies dêv'loppent et craîssent.

Histouaithe

Eune rueûque en pâlle

Au 17^e siècl'ye, un scientiste Hollandais tch'avait nom Swammerdam dêtèrminnit qu'"lé péthe ès bourdons" ou "l'maître bourdon" 'tait en véthité eune feunmelle.

Crianches

Nou criyait qu'i' fallait mett' eune néthe vouaile à couvri les rueûques quand l'maître d'la maîson pâssit l'pas, car autrément les moûques à myi meuthent étout.
Avant d'êss'mer, les moûques à myi 'taient s'posées dé dithe: Quand, quand, quand? Démain, démain, démain!
À l'êss'mage, nou faîthait eune grande sonn'nie dé paîles et d'bachîns pouor encouothagi les moûques à myi dé lus poser.

Ditons

abrié coumme eune moûque à myi
chèrgi coumme eune moûque à myi
un êssaim en Mai vaut eune vaque à lait