Mangni d'Sanmathès
Ch't' articl'ye fut c'menchie en Jèrriais
|
Lé Mangni d'Sanmathès (
Mangni d'Sanmathès) est un mangni en la pâraisse dé Saint Cliément en Jèrri.
Lé nom du Mangni d'Sanmathès veint du fait qu'la tèrre par là-bas 'tait un mathais salé (salse marais). Dans les touos vièrs temps nou s'tchait la sausse pouor fabritchi l'sé.
Nou dit qué, même au 19e siècl'ye, lé tèrrain 'tait acouo si ieauseux qué ch'tait pôssibl'ye d'aller en Ville en baté - au mains eune partie du c'mîn - sans aller en mé. Y'avait un canné l'travèrs du mathais (ch'fut încorpouothé dans la bangnérêsse au 20e siècl'ye tch'est achteu changie en mathe).
Lé colombyi du Mangni d'Sanmathès est l'pus vièr en Jèrri. I' fut bâti au 11e siècl'ye et contcheint 500 pliaiches pouor les pigeons. Temps pâssé, seul'ment les Seigneurs avaient l'drouait d'garder des pigeons et i' bâtissaient don des colombièrs.
Les preunmièrs propriétaithes du Mangni 'taient les de St. Hilaires ès 12e, 13e et 14e siècl'yes. Tout chein tchi reste d'lus temps est la crypte d'la chapelle qu'nou peut vaie souos l'Mangni. Les Payns et les Dumathès t'naient l'Mangni jusqu'à 1734 (nou-s'y vait eune pièrre d'mathiage tchi mèrque l'unnion des deux fanmil'yes), et pis les Hammonds et les Mouothants l'acatîtent à lus tou.
Les bâtisses du Mangni ont 'té changis avaû les siècl'yes ès mains des difféthents Seigneurs, et la grande maîson du Mangni nos présente eune fache d'élégance.
Lé Mangni 'tait fanmeux pouor ses gardîns même y'a trais chents ans, mais les gardîns qu'nou vait achteu sont l'travas d'un Angliais, Messire James Knott, tch'acatit l'Mangni en 1924. I' fut né en Angliétèrre en 1855 et fît sa forteune dans la mathinne marchande.
Quand Messire James Knott acatit l'Mangni, i' c'menchit à plianner les mangnifiques gardîns et empliyit quarante gardinnièrs pouor faithe tout l'travas.
Înfluencé par l'Orient, il înstâllit eune cauminne Japonnaise et un gardîn dg'ieau auve des statues Orientales. Les vîsiteurs d'achteu aiment vaie l'gardîn enmuthailli et l'gardîn ès hèrbes étout, tch'est pus récent.
L'Mangni d'Sanmathès est ieune d's attractions d'Jèrri pouor les touristes, et y'a d's annimaux et tout pliein d's activités et des fêtes duthant l'Êté. Y'a un musée d'vièrs ôtis agritchultuthels et nou fait sèrvi l'preinseux pouor la faîs'sie d'cidre au S'tembre.
Lé Seigneu d'Sanmathès est l'Sieur Vincent Obbard.