Caernarfon

Ch't' articl'ye fut c'menchie en Jèrriais

Caernarfon est eune ville en Gwynedd dans l'Nor-Vouêt d'Galles. L'nom d'la ville veurt dithe en Gallouais: "lé châté (dans la contrée) endrait Ynys Mon".

Lé châté sus la caûchie

Histouaithe

Les Romains fondîtent un fort en 77-78 tch'avait nom Segontium tch'était l'prîncipa fort du Nord d'Galles. Ch'est chu fort tchi donnit l'nom d'achteu à la ville.

Pouor l'13^e siècl'ye la ville avait dêv'loppé et un comté d'Caernarfonesire fut grée en 1284.

Douard I d'Angliétèrre prînt Galles en 1283 et c'menchit la bâtithie d'châtchieaux pouor contrôler l'pays. L'chein d'Caernarfon fut c'menchi sus l'bord d'la riviéthe Seiont. Lé châté gângnit s'n appathence d'achteu d'vièrs 1323 mais la bâtithie n'fut janmais ag'vée. Nou dit qu'lé rouai fut înspithé par les muthâles dé Constantinopl'ye qu'i' connaîssait ès Crouaîsades.

L'rouai Douard II d'Angliétèrre fut né dans l'châté en 1284. I' fut l'preunmié héthitchi du trône d'Angliétèrre nommé Prînce dé Galles.

Quand l'învestissement du Prînce dé Galles fut ravigoté en 1911, lé Prînce Douard fut assèrmenté dans l'Châté d'Caernarfon. L'învestissement du Prînce Charles y prînt pliaiche étout en 1969.

Adminnistrâtion

Entre 1889-1974 la ville 'tait l'siège du conseil du Caernarfonesire. Achteu ch'est l'siège du conseil d'Gwynedd.

Tchultuthe

Caernarfon est la ville tch'a l'pus haut rât des cheins tchi pâlent lé Gallouais - dans les 86% (s'lon lé r'censement d'2001).

Caernarfon atchilyit l'Eisteddfod Nâtionnal en 1862, 1894, 1906, 1921, 1935, 1959 et 1979.