Ch't' articl'ye fut c'menchie en Jèrriais

Eune bike (aen baïce, eune machinne, eune deux-reues) est un mouoyen d'transport à deux reues tch'est boulé en pédalant (ouaithe qu'nou piêsse trouver des bikes êlectriques au jour d'aniet tchi n'sont pon considéthées des motor-bikes car nou r'chèrge les batt'ties en pédalant).

Des bikes partchies

Auprès la marchéthie, la bike est l'transport l'pus fait sèrvi dans l'monde, mais coumme des pays lus îndustrialîsent la bike est à pèrdre sa position fache à la vaituthe.

La bike fut dêv'loppée en Ûrope duthant l'dgiêx-neuvième siècl'ye. Un Allemand, Karl Drais, înventit eune manniéthe dé deux-reues sans pédales tch'avait nom vélocipède d'vièrs 1817.

Un Êcôssais, Kirkpatrick Macmillan, înventit eune chaînolle en 1840 pouor pouver touônner la reue d'driéthe.

La pédal'lie offrait pus d'libèrté ès femmes

Mais la bike fut avanchie préchainement en France auve des pédales sus la reue dé d'vant.

En 1888 John Boyd Dunlop învent l'tyeur pneumatique. Auve lé dêv'loppement d'chabots praticabl'yes, la bike dévînt un transport populaithe, et les pays Ûropéens exportîtent l'ûsage d'la bike dans lus colonnies.

Auve l'învention d'la vaituthe à moteur, dans tchiques pays la bike pèrdit sa pliaiche, mais d'aut's pays en gardant du run sus les c'mîns pouor les bikes encouothageaient la continnuâtion d'la pédal'lie.

D'pis l's années 1960, la faîchon des bikes à montangne a rapporté la pédal'lie à des pliaiches où'est qu'nou-s'en avait pèrdu la couôteunme. Et l'întéthêt envithonnementa dans l'transport a pèrsuadé d's autorités d'encouothagi la pédal'lie dans les ville atout des pars à bike, des c'mîns à bike et d'aut's mouoyens.

La courséthie à bike est hardi populaithe dans tchiques pays - la Touônnée d'France est la course la mus connue du monde. Chutte course-là a 'té couothue d'pis 1903.

Un mousse peut pédaler driéthe eune grand' pèrsonne

Y'a des bikes tchi sont faites ou amendées pouor tchithier des marchandises (des bikes à cartchaîson) ou des pèrsonnes (des taxibikes), épis nou peut chèrgi des tchithettes pouor des cartchaîsons ou des mousses qué nou hale en driéthe.

Viyiz étout amendaer

 

Y a co' de quei à vei' ou à ouï' entou'
bicycle
sus les Coumuns à Viquipédie