Ch't' articl'ye fut c'menchie en Jèrriais


Abraham Dé Gruchy (29 d'Septembre 1780 – 9 d'Octobre 1864) 'tait un marchand d'Jèrri et fondateu d'la grande boutique siez D'Gruchy.

Abraham 'tait l'fis dé Ph'lippe Dé Gruchy d'Saint Saûveux et Lîzabé L'Gé. Il ouvrit eune boutique en 1810 à Saint Pièrre. Lé Génétha Don 'tait parmi ses pratiques. En 1825, il ouvrit eune boutique dans la Grand' Rue à Saint Hélyi tchi vendait d's habits pouor des mêssieurs et des danmes faits par un couôtuthyi qu'il emplyiait à Londres. Eune année pus tard, lé conmèrce èrmuit dans la Rue d'Driéthe, où'est qu'il est au jour d'aniet. Abraham, auve les finnances dé Jean L'Bro, l'oncl'ye à sa bouonnefemme, agrandit la boutique en acatant les maîsons ès vaîsîns et pouor 1854 nou pouvait entrer dans la boutique dé trais rues: la Rue d'Driéthe, la Rue Dumathès et l'Neu C'mîn.

En 1851 i' 'tait parmi les conmèrçants tch'annoncîtent qu'i' n'lus en allaient d'aut' atchilyi les livres tournois, mais lé hèrtchîn êmoûtchi l'pèrsuadit d'changi d'avis.