Ch't' articl'ye fut c'menchie en Jèrriais

L's Îles Britanniques sont d's îles dé l'Atlantique du Nord en Ûrope.

Où'est qu'i' sont l's Îles Britanniques (sans l's Îles d'la Manche)

Touos l's ièrs né vaient pon d'eune sorte tch'est qu'i' sont l's Îles Britanniques. Pouor la mâjorité des gens, ch'est la Grande Brétangne, l'Irlande et l's îles à l'entou. Lé nom d's îles est don géographique, pas politique, car y'a pus d'un êtat dans l's îles.

Mais y'a des gens, sustout en Irlande, tchi dithent qué raîque la Grande Brétangne et l's îles associées sont Britanniques, et qu'l'Irlande et ses îles né sont pon Britanniques. Ches'-là n'ont pon pouor achteu proposé un aut' nom tch'éthait satisfait ès protêts.

L's Îles d'la Manche né sont pon strictément géographiquement dans l's Îles Britanniques, mais pouor la conv'nanche politique sont souvent dêcrites là-d'dans. La louai du Rouoyaume Unni a définni en Angliais "British Islands" (à la pliaiche dé "British Isles") à seule fîn d'comprendre lé Rouoyaume Unni, l'Île dé Man et les Bailliages dé Jèrri et d'Dgèrnésy.

Lé nom veint des Prétanni tch'y d'meuthaient dans les touos vièrs temps, s'lon l'Grèc Pythéas au 4e siècl'ye d'vant l'Christ et Diodoros dé Sicile d'vièrs 50 d'vant l'Christ. Chu nom fut prîns en Latîn par les Romains pouor lus provînche dé Britannia.

Y a co' de quei à vei' ou à ouï' entou'
l's Îles Britanniques
sus les Coumuns à Viquipédie