Ch't' articl'ye fut c'menchie en Jèrriais

Fort Régent (audgo Fort Régent) est un fort sus l'Mont d'la Ville dans la Vîngtaine d'la Ville, Saint Hélyi en Jèrri.

L'lief du Fort donminne la Ville d'la Baie d'la Ville

Lé Mont de la Ville fut acaté par lé gouvèrnément du Rouoyaume Unni pour £2,780 en 1804. Lé dêv'loppement c'menchit en 1805, lé 7 dé Novembre, quand lé Lieut'nant Génétha Don, Gouvèrneux d'Jèrri, mînt la preunmié pièrre. L'architecte 'tait Moussieu John Humphrey et lé couôtage finalement pour la construction 'tait dans les £375,203. Les pièrres dé taille fûdrent carriées dans la carriéthe du Mont Mado à Saint Jean.

20 d'Avri 1814, lé nouvieau fort fut nommé l'Fort Régent en l'honneu d'sén Altesse Rouoyale lé Prînce Régent.

L'armée rédguliéthe fut stâtionnée au Fort jusqu'à 1932. Les seuls boulets à être tithés étaient par les Allémands qu'otchupîtent lé Fort duthant la Deuxième Dgèrre.

Lé Fort fut acaté par les Êtats d'Jèrri en 1958 pour £14,500. D'pis l's années 1970 lé Fort a 'té transformé en centre dé sport et d'divèrtissement atout les sou d'la lot'tie. Un grand lief modèrne a 'té bâti sus les remparts à seule fîn d'enfreunmer la pathade. La bangnérêsse ouvèrte en 1971 fut freunmée en 2003 coumme ou fut rempliaichie par la cheinne du Quartchi du Hâvre.

Y a co' de quei à vei' ou à ouï' entou'
l'Fort Régent
sus les Coumuns à Viquipédie