Modèle:Lumyire (JER)
Le p'ré est eune bouaisson d'alcohol typique d'Nouormandie qu'nou fait aveu d'la paithe. Ch'est eune mannièthe d'cidre mais fait aveu des paithes au lieu d'paommes. Le p'ré est fait sièvant la tradition dans l'pays du Passay (autouor d'Domfront et du pays de Domfront), rapport que la tèrre et l's conditions du cl'yimat sont bouonnes dans chu coîn-la pou faithe d'la paithe. Au printemps, l's péryis du pays d'Domfront baillent des fl'yeus et ch'est pus tard, en autouonne que je f'sons la tcheuillaison.
Le p'ré s'prodieut en famille souvent dans l's bordages Nouormands, et y a itou des tchânes d'production dans des p'tites ûsines.
En France, ch'est dans l'sud d'la Nouormandie, dans l'pays du Passay dans l'Orne que je prodieusons le p'ré d'tradition, maugré que j'en faichions itou eun miot dans l'payis de Biauvais en Picardie (mais chute production reste raide p'tite).
Le p'ré est eun alcohol d'paithe com j'en pouvons trouver dans d'autres coîns du monde : en Angliétèrre, eune vièle technique héritée des Nouormands baille eun alcohol tch'est eun miot com le p'ré et qu'is appellent l’perry, en Allemangne, i font itou eun tél alcohol qu'il appellent l’Birnenmost. Parfin, l's Nouormands tchi ont viagi au Canada dans l's sièques préchédents ont itou rapporté aveu yeus lieus technique d'alcohol d'paithe, et lieus déchendants au Tchubec en prodieusent anhyi encô.
De l'iaoue-de-vie de p'ré est faite aveu du jus de "paithes à p'ré" êcauffé, bouoilli, mûthi et parfin repâssé (adon, nou dit que l'jus est paré). Quand j'avons de l'iaouo-de-vie de p'ré, je pouvons encô faithe du vin de litcheur que nou-s-appelle le p'riné (com l’paommé pou l's paommes) aveu l’mouôt (l'jus d'paithe à p'ré tchi n'a poînt encô ieu l'êcauffaison d'alcohol).
Nou peut même faithe d'la gl'yache de p'ré com je f'sons d'la gl'yache d'alcohol d'paommes ou d'la gl'yache aus paithes.