Colonne

Ch't' articl'ye fut c'menchie en Jèrriais

Eune colonne, dans l'architectuthe, est un haut cŷlîndre en pièrre ou ofûche en bouais tchi souôtcheint un pliafond, un lief ou aut' structuthe. Y'a étout des colonnes tchi sont êrigies coumme des monuments.

Les manniéthes dé colonne cliassique

Les preunmié colonnes faites sèrvi dans la bâtithie 'taient sans doute des trous d'bouais. Nou-s'abatt'tait des bouais et les graiethait atout eune tîle. Quand les Vièrs Grècs dêv'loppîtent lus colonnes, lus colonnes stchulptées ramémouaithaient les mèrques sus les trous tchèrpentés. L's Êgyptiens, ieux, dêcothaient lus colonnes coumme des palmes.

Architectuthe cliâssique

Dans l'architectuthe cliâssique nou distîngue des difféthentes ordres dé colonne:

• 
  Colonne Dorique: La colonne est sîmpl'ye à haut, san trou est boêté.
• 
  Colonne Toscanne: La colonne est hardi sîmpl'ye, sans les boêteuses d'la colonne Dorique. Ch'est chutte colonne tchi 'tait faite sèrvi dans l'architectuthe donmestique d'la manniéthe dite Georgienne.
• 
  Colonne Ionnique: La colonne est boêtée et san haut a des rouôlots ès carres.
• 
  Colonne Corîntchienne: La colonne peut êt' boêtée ou nânnîn, et san haut est en forme d'un touffet d'fielles d'acanthe. Les Vièrs Grècs né faîthaient sèrvi qu'rarement la colonne Corîntchienne tchi 'tait faite sèrvi pustôt par les Romains.
• 
  Colonne Composée: Lé haut d'la colonne est composé des fielles d'la colonne Corîntchienne et des rouôlots d'la colonne Ionnique. Ch'tait l's architectes d'la R'naîssance tchi faîthaient sèrvi pustôt chutte colonne.