Ch't' articl'ye fut c'menchie en Jèrriais

Cantebruge (en angleis Cambridge) est eune ville d'Angliétèrre. D'pis 1951 Cambridge a 'té eune cité.

Cambridge, en ville

Histouaithe amendaer

Entouothé d'mathais, l'mont tch'a nom achteu l'Mont du Châté fut settlé duthant l'Âge dé Bronze. Les Romains y bâtîtent un camp pouor la d'fense d'la crouaîs'sie d'la riviéthe Cam. Les Saxons otchupîtent la ville auprès la tchête d'l'empithe en Grande Brétangne, mais s'lon les r'cords ch'tait raîque eune faillie p'tite ville. S'lon la Chronique Anglio-Saxonne la ville avait nom Grantebrycge (l'pont du Granta). Les Vikings arrivîtent en 875 et l'conmèrce apportit d'la prospéthité à la ville.

Auprès la Contchête Nouormande, les Nouormands bâtîtent un châté sus l'Mont du Châté – la ville avait nom achteu Cantebrigge.

L'Unnivèrsité amendaer

En 1209 d's êtudgiants tchittîtent Oxford et allîtent à Cambridge. V'là tch'est l'quémenchement d'l'Unnivèrsité d'Cambridge. L'pus vièr des collèges d'achteu est Peterhouse tchi fut fondé en 1284. Pouor des siècl'yes, les unnivèrsités d'Oxford et Cambridge 'taient les seules unnivèrsités en Angliétèrre.

En 1992 la Polytechnique Anglia, tch'avait ieune d'ses cliôsées d'unnivèrsité à Cambridge, èrchut sa charte d'unnivèrsité. D'pis 2005 oulle a nom l'Unnivèrsité Anglia Ruskin.

Silicon Fen amendaer

Lé caractéthe dé Cambridge 'tait bein difféthent au chein d'Oxford viyant qu'la ville ès mathais n'avait pon attriotchi des mannifactuthes coumme à la cité d'cliochièrs rêveurs. Tout coumme, l'avanchement d'la scienche dé compiuteurs à Cambridge d'vièrs la fîn du 20e siècl'ye attriotchit d's offices dé software et des mannifactuthes dé technologie. Nou-s'a mênommé les pars îndustriels du bord d'Cambridge "Silicon Fen", v'là tchi veurt dithe "lé mathais d'silicon".