Brutalisme
Ch't' articl'ye fut c'menchie en Jèrriais
|
Lé Brutalisme est un style d'architectuthe modèrniste tchi présente eune structuthe tch'a du run construit pus à co atout d's êléments et matéthiaux dans un êtat crû.
Ch'fut Le Corbusier ès années 1940s tchi mouôntrit l'preunmyi d's êffets d'chînment rîlyi par la manniéthe dé bâtithie. L's architectes Angliais Alison et Peter Smithson fîtent sèrvi l'mot Brutalism pouor la preunmié fais en 1954 et l'mot 'tait applyitchi a des bâtisses dé chu style avaû l's années d'pis.
L'architectuthe Brutaliste 'taient bein souvent faite sèrvi pouor des grands bâtisses publyis car la faîs'sie sèrvi d'brut chînment 'tait pratique et pas chiéthe. Tout coumme, eune itelle structuthe à grands blios n'est pon aîsi à amender et l'couôtage dé maintchien a provotchi la dêmolition d'hardi d'ches bâtisses.
Lé style n'tait pon hardi populaithe auve lé publyi - la grandeu des structuthes n'tait pon tréjous au goût et n'aîdgait pon à faithe comprendre coumme tchi navidgi l'tou des blios. Nou crititchait étout l'chînment tch'éthait peu semblier bé au solé mais dans un clyînmat du Nord en Ûrope ou Améthique du Nord pathaîssait gris et baîssant l's esprits.
